آغالار!
بيري دئير: گرك فالا باخيلا!
بيري دئير: گرك دعا يازيلا!
بيري دئير: گرك ائوي ييخيلا،
بو كيشيني گلين ييخاق، آغالار!
سحر تئزدن كيشي گئدر ايشينه،
پينتي آرواد چارشاب سالي باشينا،
فاتما خالا گلر، دوشر پئشينه،
نه خوش اولار دعا يازماق، آغالار!
ايكي آرواد كوچه‌لري دولانير،
چرشابلاري زيغ-چامورا بولانير،
فالچي قارداش خانيملارا سولانير،
بوينو يوغون، شلپاپاخ، آغالار!
اول بير آز دانيشارلار، دئيرلر،
چوبوقلاشيب قندو نابات يئيرلر،
اوندان سورا ميس-تاس يئره قويارلار،
گلين بير آز فالا باخاق، آغالار!
آرواد گرك الين چكسين تاسينا،
فالچي باخار الينين هناسينا.
بئله آرواد، ارين گلسين ياسينا!
ياخشي بيلك، قشنگ بوخاق، آغالار!
قتباشيلار دؤوره‌سينه دوزولور،
فالچي باخار، خومار گؤزلر سوزولور،
باشين اير، دوداخلاري بوزولور،
سسلر گلي تاراخ-تاراخ، آغالار!
كافير هبلر تاس ايچينه تؤكولو،
كيمين باشي، كيمين قارني سؤكولو،
ايفريتلرين جومله قاني تؤكولو،
كيميسي ده اولو دوستاخ، آغالار!
بير تومن پول بئش قتباشي وئريلو،
ار-آروادين قاراباختي دورولو،
ائوده گئنه اجينه‌لر ديريلو،
گئنه او آش، او ايسپاناخ، آغالار!
فاتما خالا هر گون گلر بولارا،
يئير، ايچر، الين سيلر دووارا.
گئدجاخلا صاباح مالا، بازارا،
سورا گؤراخ، نه ياپاجاخ، آغالار.
صاباح اولار گئدر مالا، يوزانا،
بئش قران دا وئرر دعا يازانا.
باشا گلمز، قالو آرواد آذانا،
آخشام اولدو، يانار چيراخ، آغالار!
موللا يازان دعالاري بيتورو،
ياري گئجه قوناخلاري اؤتورو،
فاتما خالا قاپيياجان گتيرو،
خانيم گيرر گؤزدن ايراخ، آغالار!
كيشي گليب، اودون قويوب اوجاغا،
قارانليخدا ياغي تؤكوب چيراغا.
خانيم گلير، كيشي دورور آياغا،
سيزه زحمت، اونا داياخ، آغالار!
كيشي وورار، آرواد چكر هاواري،
پارچالانيب كؤينيي‌نين كناري.
قانا باتيب زنجيره‌سي، ناواري،
قورتاراجاخ، گؤراخ نه واخ، آغالار؟
باش ياريليب، چوماخ گزير هاوادا،
ماجال اولموب چارشابيني چيخادا.
سني تاري، تأثيره باخ دعادا،
دورون گئداخ، بيز ده آلاخ، آغالار!
فاتما خالا ناغيل ائلر ارينه؛
-بيز ياخچيليخ ائتدوخ بو گون بيرينه!
بوغوشدورا هر گون ياري-يارينا،
او دونيادا گؤرمز دوزاخ، آغالار!
بو اسنادا ناگه قاپي آچيلير،
پينتي آرواد گلير، قاني تؤكولور.
فاتما خالا بونو گؤروب، اكيلير،
باشيميزا نه كول تؤكاخ، آغالار؟
لعنت ائيلر آرواد دعا يازانا،
فاتما خالا هاني، باسسين قازانا؟
خبر وئرين گلسين فالي يوزانا،
يوخلاماسا، اولسا اوياخ،آغالار!
سؤزون كسيب، پيشيك قاشدي ائشييه،
تأثير ائتدي بو سؤزلر چوخ كيشييه.
بير سؤز دئييم؛ مؤجوز اير ياشييا،
اونا چاتماز هئچ بير يانشاخ، آغالار!